እራሱን ቢያመጣ ታሪክ ተመልሶ
ዛሬም አለሁ ቢለን የትናንቱን ጥሶ
ያሳየን ይሆን ወይ የዚያን ዘመን ትውልድ
እንደ ሻማ ቀልጦ ለሌላው የሚነድ
ያ ትውልድ ! ለጠላት ዓላማ ያላጎበደደ
ታሪክን ያልናደ እውነትን ያልካደ
ግንባሩን ሳያጥፍ ከጠላት ተናንቆ
ስንቱን አፈር በላው ስንቱ ቀረ ወድቆ ፤
በደሙ ጠብታ በአጥንቱ ክስካሽ
ተጠየቅ ለሚሉት እየሰጠ ምላሽ
አለፈ ያ ትውልድ ላናየው ዳግመኛ
ያደራ ቃል ትቶ፡ አስረክቦ ለኛ ፤
ግን ! ጠብቀነዋል የአደራ ቃል ውሉን
የጅግንነት ውርሱን
በደሙ እያወጀ አሸናፊነቱን
ቆርጦ ተሰዋ እንጂ መች አጠፈ ፊቱን ፤
የተፋለመበት የሞተበት ጎራ
መዝሙር ያሰማበት ፋኖ ተሰማራ
በአድር ባይ ተወርሶ፡ አደራው ተጥሶ፡ ቃሉ በቃል ፈርሶ
ምን ይላል ያ ትውልድ ቢያየው ተመልሶ ፤
ቢወለድ ዳግመኛ ያ ትውልድ ቢመጣ
ባትጨክንበት ሞት ባታስቀረው ውጣ
ምን ይል ይሆን ዛሬን በትናት ቢቃኝው
አንበሳ ተከሶ ዝንጀሮ ሲዳኘው ፤
እውነት እየተፋ በብእሩ ቀለም
በድቅድቅ ጨለማ ብሩሕ ዘመን ሲያልም
ሕልሙ ሳይፈታ ግቡን ሳይጨብጠው
መራራውን ጽዋ ደፍሮ የጨለጠው
ምን ይታዘብ ይሆን፡ በዚያኛው መነጽር ይህን ትውልድ ቢያየው ፤
እናቸንፋለን ድሉ የሕዝብ ነው
የአገሬን ሞት ከማይ ሞቴን እመርጣለሁ
የፋሽት ቅጥረኛ ባንዳ ከመሆን
ዘቅዝቀው ይስቀሉኝ ደሜንም ይጠጡት ይብሉት ሥጋዬን፤
ልራብ ለወገኔ ብጠማም ግድ የለም
አካሌ ብራና ደሜም ይሁን ቀለም
የአጥንቴ ፍንክትካች ከሜዳ ይለቀም
አይውጣልኝ ሙሾ አይታወቅ ቀብሬ ፤
ከመሆን አወዳሽ የአምባገነን አንጋሽ
ላንቃዬን ከመክፈት ሲጣልልኝ ቁራሽ
ታግዬ ልዋደቅ ልሰለፍ በግንባር
ምን አልመጠመጠኝ ለሰው ልጅ ሞት ላይቀር
ብሎ አለፈ ያ ትውልድ ላናየው ዳግመኛ
ያደራ ቃል ትቶ፡ አስረክቦ ለኛ ፤
አልተቀያየረ አንድ ነው ደማቸው
አልተከላለሰ ከሌላ ዘራቸው
ገደል አልተሰራ በመካከላቸው
ይህን ትውልድ ከዚያ ምን አራራቃቸው ፤
ጥላሁንም ወንድም ማርታም እህታቸው
ዘረአይም አጎት ጣይቱም አክስታቸው
ቴዎድሮስም አያት አብዲሳም አባታቸው
እንዲ ነው እንግዲህ የዘር ሐረጋቸው
ምን ነካው ይህ ትውልድ ፈሰሰ አሞቱ
ምነው ከዳው ወኔ የአያት ቅድመአያቱ
አሜን ብሎ መኖር ተሸክሞ ቀንበር
አልነበረም ልምዱ ያ ትውልድ ይመስክር ።
No comments:
Post a Comment